LIEVE TIED

'Lachen en liepen in één buultjen ' is 't tweede gedichtenbuuksken van Netty Hengeveld.

​

Twee jaor geleden is ‘t alwaer dat ‘Een helen troost…’ uutkwam. Een spannenden ondernemming was ‘t veur mi’j um in eigen beheer een gedichtenbundel uut te geven. ‘t Spannendste was ‘t misschien nog wel um de gedichten, die ik veur bepaolde mensen of zekere gelaegenheden had eschreven, now veur een groter voetlecht te brengen. Zollen anderen ze wel mooi vinden? Literaire poëzie kö-j ‘t jo niet numen, hooguit tastende weurde waormet ik hoppe een klein betjen troost te können bieden zodat mensen zich eheurd en ezien vuult in eur verdriet. ‘t Was veur mi’j dan ok een groten verrassing toen ik te heuren kreeg dat ‘Een helen troost…’ enominaerd was veur ‘Het beste boek Achterhoek-Liemers 2014’.

 

‘t Juryrapport had ‘t aover: ‘Prachtig innemend, gevoelig gebruik van streektaal. Streektaal als direct transportmiddel naar en uit het hart. Een boek dat dichtbi-j kump. Bruukbaor op momenten da-j dat neudig hebt. De boodschap wordt versterkt door de passende eenvoud van de gekozen illustraties.’ Inmiddels is ’t schrieven van gedichten een maniere van laeven eworden. Ik kan der niet maer buten. ’t Helpt mi’j  um ok zelf met ’t lieden in dizze welt umme te können gaon. Ik zal probaeren in ‘t kort uut te leggen hoe ik dat vule.

Wi’j bunt geneigd onszelf te zien as uniek, totaal anders dan de ander. Zeker at ’t ons veur de wind geet, praote wi’j onszelf veur hoe-w van anderen verschilt: da-w händiger bunt, of slimmer en daordeur succesvoller.  Maor zo’n holding brök ons op a-w met ’t lieden van doen kriegt. Dan bu-w veural slim kwetsbaor en komme wi’j met ons uniek waen gin stap wieter. Pas as ons persoonlijke lieden wördt töt ’t lieden dat now eenmaol deel uut mek van ’t menselijk bestaon, van ‘t lieden van alle mensen, dan wördt dat lieden naor een andere dimensie etild. Dat is ’t niveau van compassie, waorop wi’j allemaole alens en verbonden bunt. Op dat niveau dut métlaeven met anderen ons eigen harte ok goed en kan ’t metlaeven van anderen ons deur een moeilijke tied hendragen.

 

Dat letste hebbe wi’j de afgelopen tied möggen ervaren toen miene beide olders totaal onverwachts en tegeliekertied kanker blekken te hebben. An eur draag ik, samen met miene zuster Marjan die de illustraties in dit buuksken hef verzörgd, dizze bundel op. Wi’j hebt der  groot respect veur hoe-t zie vertrouwen holt en lecht blieft zien. Hoe-t ze ondanks eure träöne ok nog iederen dag könt lachen. ‘Lachen en liepen in één buultjen’, zo numen opoe dat.

 

Ik wens ow bi’j ’t laezen van dit bundeltjen mooie momenten toe, momenten met een lach én een traon!

 

Een groet in verbondenheid,  

 

Netty Hengeveld

​​

 

't Buuksen inkieken?

 

​​​

A'j klikt op de foto, dan kö-j alvast een paar pagina's uut de verscheidene hoofdstukken van 't boek bekieken. De illustraties bunt emaakt deur Marjan Hengeveld. De umslagfoto kump van Geert van der Veer. De bundel besteet uut 69 gedichten op 116 blz. romanpapier en een mooien, stevigen matpapieren umslag. De gedichten bunt in edeeld in thema's rond: tied van metlaeven, tussen hoppe en vrees, tied van afscheid nemmen, laeven met een leuge plaatse, zovölle soorten van verdriet, tied van bezinnen en tied van gräölen.

 

't Boek kost 12.50 euro, inclusief verpakking- en verzendkosten. I'j könt 't bestellen deur een mailtjen te sturen naor info@lievetied.nl met daorin vermeld ow naam en adres en de titel van 't gewenste boek.   I'j kriegt dan een factuur terugge emaild. Zo gauw 't factuurbedrag is betaald, krie-j 't boek gelieke toe ezonden.

​

Korting bi'j de bestelling van beide titels

A-j zowel 'Een helen troost...' as 'Lachen en liepen in één buultjen wilt bestellen, dan kost ow de beide buukskes gin 25, maor 22 euro. Dizze anbieding geldt zolange der nog veurraod is.

​

ISBN

't ISBN nr. is ISBN/EAN: 978-90-822674-1-9.

Met dit nummer kö-j 't ok bestellen bi'j ow eigen boekhandel.

 

Boekhandels könt 't boek in consignatie nemmen. Nem veur de inkooppries efkes contact op.

​

Veurwaarden: Binnen veertien dage kö-j de bestelling ongedaon maken. De kosten veur 't teruggesturen van de buke bunt dan wel veur ow raekening.

​

Algemene voorwaarden

Herroepingsformulier